A̱byin Abya

Maba̱ta̱do

Ca̱crak

Fantswam

Gworog

Sholyia̱

Ta̱kad

Tuku

Á̱ lyuut ati̱kut wuni di̱n Tyap Maba̱ta̱do ja (Maba̱ta̱do)

A̱byin Abya

a̱byin badundung Naijeriya

Kpaat	27 Zwat A̱ni̱nai 1991
A̱lyoot a̱gwomna̱ti	Abia
A̱lyoot a̱lyem a̱byin	Abia
A̱lyoot da̱nian	Aba River
A̱lyem a̱gwomna̱ti	Shong
Tsung-a̱byin	Afi̱rika
A̱byin	Naijeriya
A̱cyian	Umuahia
Shyia̱ di̱ fam tyok a̱byin	Naijeriya
Shyia̱ di̱ fam jen	UTC+01:00
Coordinate location	5°25′0″N 7°30′0″E
Ofit wu nang a̱kwak a̱son a̱gwomna̱ti wu ba̱ng a̱ni	Governor of Abia State
A̱kwak a̱son a̱gwomna̱ti	Alex Otti
Sa a̱pyia̱ a̱gwomna̱ti	Executive Council of Abia State
Sa kpa cam a̱byin	Abia State House of Assembly
Nyian tyok tazwa	Enyimba International F.C., Abia Warriors F.C.
Ci̱t	A̱byin Imo
Zwunzwuo-a̱muup	440001
Official website	https://abiastate.gov.ng/
Tung zwa a̱pyia̱ a̱lyiat hu	economy of Abia State
Sa mat tá̱si̱la	Category:Maps of Abia State, Nigeria

 

 Neet mi̱ Wukideita

A̱byin Abya (Fa̱k; A̱kum-a̱cyi: Alaọha Abia) yet a̱byin badundung kya di̱ fam A̱tak-A̱tyin Naijeriya hu. A̱cyian a̱byin kikya yet Umahya a̱wot a̱keang nka ka̱ byia̱ á̱niet a̱ swak a̱ni, kikya yet Aba. Mali Kpacam A̱byin Abya kikya kpak cám a̱byin ka.

A̱byin ka yet a̱nyiung mami a̱cyuang bibyin Naijeriya hu, a̱wot ka̱ si̱ byia̱ gak ma̱ng Imo di̱ fam jenshyung hu, Ki̱rosi̱riva di̱ fam a̱byin hu, Rivat di̱ fam a̱tak hu, A̱na̱mba̱ra di̱ fam a̱za-jenshyung hu ma̱ng Inugu mbeang A̱byin A̱bonyi di̱ fam a̱za-a̱tyin hu. A̱byin ka ka̱u a̱feang ma̱ng kap nyiung ku shyia̱ mi̱ susop nian Da̱li̱ta Naija di̱ fam a̱tak hu a̱wot á̱kum a̱byin ka si̱ shyia̱ susop byiek Ki̱rosi̱va-Naija jija. A̱ghyui Imo ka ma̱ng A̱ghyui Aba ka kpa̱ra̱p a̱ sweap a̱gi̱gak jenshyung ma̱ng a̱tak a̱byin ka. Á̱ lyen a̱byin Abya ka ma̱ng hya̱u-a̱fang mbeang a̱za̱za̱rak gat, a̱wot a̱byin ka si̱ yet a̱ni̱nai mi̱ Ga̱fang Byi̱k Á̱nietbishyi Naijeriya ji neet ma̱ a̱lyia̱ 2019.

A̱lyoot ka "Abia" yet tyam-ti̱tyam lyulyoot nfam nnaai a̱byin ni̱nia na̱ nhyat ma̱ng á̱niet a̱wot ni̱nia yet Aba, Bende, Isiukwuato, ma̱ng Afikpo; mang á̱ si̱ ndyuut a̱lyoot ka "Abya" di̱n Tyap ji. A̱laseap Abya wu wa yet "A̱byin A̱gwaza wu". Abya shyia̱ mami bibyin badundung Naijeriya 36, a̱wot a̱byin ka si̱ byia̱ susot a̱gwomna̱ti mali swak ma̱ng a̱natat. Jenera Ibi̱rahim Babangida wa ku kpaat nka a̱tuk mam 27 kya mi̱n Zwat A̱ni̱nai a̱lyia̱ 1991 neet ma̱ A̱byin Imo, a̱wot a̱cyian a̱byin kikya yet Umahya, a̱wot a̱keang kaswuo nka kya si̱ yet Aba.