Eme Ufot Ekaette

Maba̱ta̱do

Ca̱crak

Fantswam

Gwolog

Sholyia̱

Ta̱kad

Tuku

Á̱ lyuut ati̱kut wuni di̱n Tyap Maba̱ta̱do ja (Maba̱ta̱do)

Eme Ufot Ekaette

a̱tyubishyi

Sot mbyin	a̱nap
A̱byin mbyin	Naijeriya
A̱tuk mbyin	21 Zwat A̱natat 1945
A̱keang mbyin	A̱byin A̱kwa Ibom
Ta̱m	a̱tyukwainfwuo-á̱niet
Cuk ji a̱ ku ba̱ng a̱ni	member of the Senate of Nigeria
Memba sot kwai-nfwuo-á̱niet	Peoples Democratic Party

 

 Neet mi̱ Wukideita

Eme Ufot Ekaette (fa̱k) (b. 1945 ) yet a̱tyukwainfwuo-á̱niet Naijeriya wa a̱ neet Ndwo Edwo-Eket a̱ni, ma̱ A̱byin A̱kwa Ibom. A̱ shyia̱ di̱ nyeang Obong Joseph Ufot-Ekaette neet ma̱ a̱lyia̱ 1971.

Da̱won ma̱ng tat-a̱pyia̱

Á̱ byin A̱yang-a̱li Eme a̱tuk mam 21 kya mi̱ Zwat A̱natat a̱lyia̱ 1945 mi̱ Ndwo Edwo-Eket, A̱byin A̱kwa Ibom, Naijeriya. A̱ ku tsa cong tat-a̱pyia̱ hu da̱ A̱vwuotyiet Banham Memorial kya, mi̱ Pa̱takwot tsi̱tsak a̱lyia̱ 1952 ma̱ng 1958. A̱ si̱ shai a̱ nwuo mi̱ Queen's College, Legwot a̱ si̱ shyia̱ a̱ja tsi̱tsak a̱lyia̱ 1958–1963 mbeang Queen's School, Inugu tsi̱tsak a̱lyia̱ 1964 ma̱ng 1966. A̱yang-a̱li Ekaette si̱si̱ shyia̱ di̱gi̱ri B.Pharm. (Hons) neet mi̱ Yunuvasi̱i Obafemi Awolowo, Ife ma̱ a̱lyia̱ 1970.

Fam ta̱m ma̱ng shyicet

A̱yang-a̱li Ekaette yet a̱bwok-a̱ki̱kan, a̱tyubwuanng, ma̱ng a̱khwukhwop a̱tyukpacam-a̱byin wa. Ekaette yet A̱tyokum-a̱cyi wa a̱ yei a̱pyia̱-nggu A̱tyukhwiki̱risi̱ti a̱ni.

Kwainfwuo-á̱niet

Á̱ khai nggu Sa̱neto mat fam-khai A̱kwa Ibom A̱tak si̱ A̱byin A̱kwa Ibom, Naijeriya, a̱ sii du tsa ta̱m hu a̱tuk mam 29 Zwat Tswuon 2007. A̱ yet kap sot-kwainfwuo-á̱niet People's Democratic Party (PDP) hwa.

Mama bah, nang gu ntsa ta̱m Sa̱neto hu a̱ni mi̱ Zwat A̱taa a̱lyia̱ 2007 ka, huhwa á̱ si̱ tyia̱ A̱yang-a̱li Ekaette mi̱ komití a̱lyiat A̱nyiuk ma̱ng Nfi̱ng, Ta A̱mali ma̱ng Nta, Gbi̱ngban ma̱ng A̱vwuo. Di̱n jen nwuan nta̱m A̱yaasa̱neto ji ma̱ a̱fa̱ng ka mi̱ Zwat Tswuon a̱lyia̱ 2009, ThisDay si̱ lyuut nyia̱ a̱ bu si̱ yuut a̱di̱dam cam a̱ghyang bah, kang ma̱ng tyei fwuo mi̱ kwak a̱son Komiti A̱lyiat Byi̱ A̱nyiuk nggu ji. Nang jen sweap a̱ni, a̱ si̱ tsa yuut a̱di̱dam bwuo cam tazwa A̱gwai A̱yaatoot na yet ma̱ A̱ghyi ba a̱ni bah, nang á̱ bwuak á̱ si̱ tsa yei a̱di̱dam cam cong-ka̱gbang wu a̱ni. A̱di̱dam cam wuni na tyia̱ á̱ bwuo cam ji̱ na tyia̱ á̱ nyim a̱nyiuk ba̱ lak nyii kwop-a̱fa mba hu, a̱bi̱baan mba ba, ku ba̱ kup a̱kukum misisi mami á̱niet a̱ni bai zwat tsat mi̱ jaru. Á̱ghyi Naijeriya mi̱ Muna̱pyia̱ Bibyin Swanta ba si̱ neap a̱di̱dam cam wuni ma̱ A̱tung Konyan ma̱ng Konyan ka, á̱ghyang si̱ ba̱ cyui mba a̱lyiat, a̱wot a̱mali mi̱ Naijeriya á̱ghyang á̱niet si̱ nwuan nggu nang kyang kwak jhya̱ a̱ni. A̱yang-a̱li Ekaette wa ku yet a̱son A̱kwak A̱son a̱nap Pharmaceutical Society of Nigeria (PSN) ka.

Ta̱m

A̱ shyia̱ yet Manager Pharmacy mi̱ NNPC, Chief Pharmacy Mabwok-á̱niet A̱khwot Á̱kwop, managing director mi̱ Safi Pharm, memba bwot mi̱ UBEC mbeang a̱kwak a̱son mi̱ Union Bank. A̱tyoli nggu wu, Ufot Ekaette, ku yet a̱gba̱ndang a̱tyunta̱m a̱gwomna̱ti wa a̱nyan wa A̱kwak A̱son A̱byin, Olusegun Obasanjo, ku khai a̱ yet A̱tyulyuut A̱gwomna̱ti Badundung wu (Shong: Secretary to the Government of the Federation (SGF)) a̱tuk mam 29 Zwat Tswuon a̱lyia̱ 1999, a̱wot sii du san ta̱m Minisi̱ta Badundung a̱si̱ Da̱li̱ta Naija (Shong: Federal Minister of Niger Delta) ma̱ a̱gwomna̱ti A̱kwak A̱son A̱byin Uma̱ru Musa Yaradua.

Cyin ma̱ng lyulyoot

Á̱ ku cyin nggu ma̱ng a̱lyoot Member of the Order of the Federal Republic (MFR), ma̱ a̱lyia̱ 2001 mbeang Lady of St. Christopher. Á̱ bu si̱ nwuak nggu a̱lyoot-tyok Adiaha Ikpaisong Oruk Anam, ma̱ a̱lyia̱ 1991 mbeang Obonganwan Akwa Ibom, ma̱ a̱lyia̱ 1991.