Hadiza Ba̱lara̱be

Maba̱ta̱do

Ca̱crak

Fantswam

Gwolog

Sholyia̱

Ta̱kad

Tuku

Á̱ lyuut ati̱kut wuni di̱n Tyap Maba̱ta̱do ja (Maba̱ta̱do)

Hadiza Sabuwa Ba̱larebe

a̱tyubishyi

Sot mbyin	a̱nap
A̱byin mbyin	Naijeriya
A̱lyoot nang á̱ ku tyia̱ nggu	Hadiza
A̱tuk mbyin	26 Zwat A̱ni̱nai 1966
A̱keang mbyin	Sangga
A̱tyia̱	Abubakar
A̱lyem mbyin	Kpat
Lilyem a̱ lyen lyiat, lyuut ku tyia̱ bwak ma̱ng a̱nhu a̱ni	Shong, Shong Kaswuo, Kpat, Gwoot
Ta̱m	a̱tyukwainfwuo-á̱niet, spaceship's surgeon, health professional, byiek-gwomna
Fam nta̱m	consultant, a̱tyulyuut, official
A̱kwok nta̱m	A̱byin Ka̱duna
Cuk ji a̱ ku ba̱ng a̱ni	Byiek Gwomna A̱byin Ka̱duna
A̱ ku nat fang hu ma̱	University of Maiduguri, Yunuvasi̱ti Ahmadu Bello
Di̱gi̱ri fang	Bachelor of Medicine, Bachelor of Surgery
Fam-jwaat fang	lyen a̱ki̱kan
Memba sot kwai-nfwuo-á̱niet	All Progressives Congress
A̱kwonu-a̱lyoot a̱yin	L484

 

 Neet mi̱ Wukideita

Hadiza Sabuwa Ba̱lara̱be (nang á̱ byin a̱tuk mam 26 mi̱ Zwat A̱ni̱nai a̱lyia̱ 1966) a̱ni yet a̱tyukwainfwuo-á̱niet ma̱ng a̱bwok-á̱niet Naijeriya wa, a̱wot nggu wa si̱ yet Byiek Gwomna A̱byin Ka̱duna ji neet ma̱ a̱lyia̱ 2019. Nggu wa yet a̱son byiek gwomna a̱nap a̱byin-badundung ka mi̱ tyok a̱sai-mbung hu, a̱wot mi̱ khai a̱yaagwomna Naijeriya a̱lyia̱ 2019 hu nang á̱ ku nyia̱ mi̱ Zwat Tsat a̱lyia̱ a̱kya ja á̱ khai nggu a̱tafa sot kwainfwuo-á̱niet All Progressives Congress ji, a̱wot á̱ si̱ bu khai mba ma̱ a̱lyia̱ 2023.

Da̱won ma̱ng tat-a̱pyia̱

Á̱ ku byin nggu A̱yang-a̱li Ba̱lara̱be mi̱ kyangbwak A̱laji A̱buba̱ka̱t Ba̱lara̱be hwa mi̱ sot a̱gwomna̱ti mali Sangga ma̱ A̱byin Ka̱duna. A̱ ku cong A̱vwuofang Pi̱raimari Di̱monti̱reshyon (Demonstration Primary School) kya, mi̱ Gwoot, A̱byin Ka̱duna, kyiak neet ma̱ a̱lyia̱ 1977 a̱ si̱ tyak ma̱ng satifikyet ghwon fang ntsa. Nang gu tyak a̱ja a̱ni, a̱ si̱ ya a̱son a̱ nat A̱vwuotyiet Sa̱ka̱ndi̱ri A̱ka̱neam A̱gwomna̱ti (Government Girls Secondary School) Soba, nang á̱ ngyei A̱vwuotyiet Sa̱ka̱ndi̱ri Sayen A̱ka̱neam A̱gwomna̱ti (Government Girls Science Secondary School) Soba a̱fwun a̱ni, mat tat-a̱pyia̱ sa̱ka̱ndi̱ri nggu hu, a̱ si̱ tyak ma̱ng General Certificate of Education (GCE) ma̱ a̱lyia̱ 1982, Nang gu ntyak a̱ni, a̱ shyia̱ nwuo nat a̱gba̱ndang Yunuvasi̱ti Ma̱iduguri wu a̱ ka shyia̱ lyen tazwa a̱ki̱kan coot á̱niet a̱ si̱si̱ ghwut ma̱ng MBBS ma̱ a̱lyia̱ 1986. A̱ yet A̱tyukpaa̱pyia̱ wa.

Ta̱m kwainfwuo-á̱niet

Ma̱ a̱tuk mam 15 Zwat Swak a̱lyia̱ 2019, nang gu ku yet a̱tyunyian ta̱m da̱ a̱kwonu gwomna a̱ni, a̱ si̱ neap Bojet Ya-a̱son-nta̱m A̱gwomna̱ti A̱byin a̱lyia̱ 2020 ji nwuak Malikpacam A̱byin Ka̱duna ka, mat a̱nia, a̱ si̱ yet a̱son a̱nap a̱ na nyia̱ a̱nia mi̱ fam A̱za Naijeriya hu.

Ma̱ a̱lyia̱ 2022, a̱ ku cat nwuo cat cuk gwomna mi̱ khai á̱niet-a̱byin a̱lyia̱ 2023 hu, a̱wot a̱ si̱ kin ti̱n bwak di̱n jen ji a̱tyucat cuk sot kwainfwuo-á̱niet All Progressives Congress, APC wu, Sa̱neto Uba Sani, ku ti̱n nggu gu yet nggu a̱kpa̱ndang cung a̱ni.. Mi̱ Zwat Tsat a̱lyia̱ 2023, á̱ si̱ bu khai nggu byiek gwomna a̱ka̱feang.

Zá̱nang ma̱ng cyin

A̱yaakwak a̱son ma̱ng á̱nietnyian nkyang nfai Afi̱rika ba ku cyin A̱yang-a̱li Ba̱lara̱be ma̱ng Za̱nang EWAH Afro a̱lyia̱ 2024 ji.