Wukipedia:A̱yaati̱kut nang á̱ tyia̱ sai tazwa/a̱gban-nkyangfang/Wukipedia
Wukipedia yet a̱gban-lyen a̱zalang wa nang á̱niet ma̱ a̱di̱di̱t neet da̱ a̱ka̱vwuo ma̱ a̱di̱di̱t mi̱ swanta hu ni̱ mun mbwak ba̱ nok a̱ni di̱ lilyem nvwuon, nang konyan jhyet di̱ mi̱n cat teang a̱ni. Ma̱nang á̱ nwai teang kurum a̱ni bah, konyan fi̱k nyia̱ konyan wa maai a̱ bwuak, shai, ku ngeang kuzang ati̱kut mi̱ ta̱m huni, ka̱nang á̱ nyia̱ shonshyon ma̱ng a̱ka̱wat byia̱ ma̱ng a̱shai na, ma̱nang á̱ jhyet nkyangmami Wukipedia na tafa lasi̱n GNU/FDL (ku GFDL) wu wa mbeang Creative Commons Attribution-ShareAlike (CC-by-SA) 4.0. Á̱ tsa nhu a̱tuk mam Zwat Jhyiung 15, 2001 wa, a̱wot á̱ nok nhu ca̱caat ma̱ng si̱tem wuki (neet ma̱ Hawaii wiki-wiki = "a̱nggang", "ma̱ng cung") wu wa.
A̱di̱dam wuki wu yet a̱cyeta̱taneang ngwat kya ka̱ byia̱ nkhang ma̱ a̱di̱di̱t na̱ vwuon ma̱ng a̱ghyang a̱ni, nang konyan wa maai shai a̱wot a̱ bu mwai ma̱ng a̱yaabi̱ra̱uza ba̱ shyia̱ ma̱ tai a̱ni, nang Mozilla Firefox, Google Chrome, Internet Explorer, Netscape, Opera, Safari, ku kuzang tangka̱i pi̱rogi̱ram ku maai fang ngwat HTML mbeang nghwughwu a̱ni. Si̱ huni hwa ghai Wukipedia ma̱ng a̱mgba̱m kuzang tangka̱i a̱yaagban lyen a̱ni: konyan a̱ byia̱ vak nwuo ma̱ A̱cyeta̱taneang ka na maai shai kuzang ati̱kut, kuzang a̱tyufang maai yet a̱tyunjhyet wa mi̱ ta̱m hu.