Wukipedia:Feminizi̠m ma̠ng Tashikum/2026
Feminizi̠m ma̠ng Tashikum 2026 yet a̱yangka̱nan lyuut bibyin swanta wa nang Wukipedia ni̱ njhyi kuzang a̱lyia̱ a̱ni kyiak neet mi̱ Zwat Sweang ba̱ng si̱ tat Zwat Tsat mat á̱ tung sak a̱yaataada á̱niet ma̱ng a̱nyiuk tashikum di̱ nfam ma̱ a̱di̱di̱t mi̱ swanta hu mi̱ Wukipedia. Ta̱m huni yet kpa Wukipedia hwa si̱ kampen kwok-nghwughwu hu nang á̱ ngyei Wiki Loves Folklore (WLF) a̱ni nang á̱ ni̱ njhyi mi̱ Wukimedia Komon a̱ni á̱ ka tung a̱ sak a̱yaataada tashikum koji mi̱ swanta hu.
A̱tsak njat a̱yangka̱nan wu, nggu wa yet á̱ tung a̱yaati̱kut ba̱ byia̱ a̱meang ma̱ng vwuon taada á̱nietbishyi mi̱ Wukipedia ku yet a̱gban swáng-a̱lyiat ma̱sa̱t wu a̱ni ma̱ng á̱kum á̱ghyang nta̱m Sotbeang Wukimedia ka. A̱leang, zi̱ na sak a̱tyem nzi̱t ka da̱ a̱lyiat feminizi̱m, nkhang-shyicet a̱nyiuk, ma̱ng pyipyia̱-a̱lyiat na̱ byia̱ a̱meang ma̱ng mba a̱ni ma̱ a̱gba̱ndang a̱pyia̱-a̱lyiat Wiki Loves Folklore wu. Ta̱m hu cat nhyat a̱bubwong ba ba̱ shyia̱ tsi̱tsak á̱nap ma̱ng á̱sam a̱ni mi̱ Wukipedia di̱n vak kai vak ku na tyai a̱ga̱sa̱t nvak taada ma̱ng si̱sak nang á̱niet nwuan sot-mbyin a̱ni da̱ a̱ka̱vwuo ma̱ a̱di̱di̱t mi̱ swanta hu.
A sang kyang bwuak a? Da̱ som á̱ghyi ba mi̱ wat bwoi a̱lyiat hu a cat nkyang bwan na a̱ja. A bye mbeang lyulyoot nghyáng meang a beang á̱ghyang á̱niet.
Ka̱ doot a bu nwuan wat a̱yangka̱nan Wiki Loves Folklore 2026 di̱ Sot-á̱niet nTyap wu mi̱ Wukimedia Komon a?
📅 A̱swap njen
1 Zwat Sweang 2026 00:01 JA̱S – 31 Zwat Tsat 2026 11:59 JA̱S
A̱pyia̱ a̱lyiat
- Tashikum: Á̱ tyei á̱nietnjhyuk ba gba̱gbak ba̱ nwuan pyipyia̱-a̱lyiat tashikum ma̱ a̱di̱di̱t neet di̱ nfam swanta na. Tyan ta̱m ji nang á̱ ku sak a̱tyem ka a̱ni, jija yet, a̱yaayet taada, sóng, bubwomtsot, nnaat mbwuot, nvwuo, nkyayak, nkyang-a̱gwai taada, nkhang tashikum, mmaat, ghwang ghwughwang, khwi, tashikum gbangbang, ma̱ng nkyang njhyang. Á̱nietnjhyet ba byia̱ a̱ka̱wat nwuan a̱yaataada á̱ghyang á̱niet mi̱ swanta hu, ba̱ ya̱baat a̱tsatsak nkyangci̱t taada na.
- A̱nyiuk mi̱ tashikum: A̱pyia̱-a̱lyiat kani si̱ ngaat a̱lyiat nang á̱ ni̱ nwuan mi̱ nwuan wa ma̱nyin, na̱ byia̱ a̱ka̱ta ma̱ng a̱nyiuk mi̱ taada a̱ni. Á̱nietnjhyet ba maai ba̱ nwuan nkhang á̱nietbwom bubwom taada, á̱nietnsong, á̱nietbwom, á̱nietsotbubwom, á̱niet a̱kat, a̱wot ba̱ ki nghwut ma̱ng nkhang na nang a̱nyiuk shyia̱ a̱mami a̱ni mi̱ tashikum gbangbang, tashikum, ma̱ng nkhang tashikum. Pyipyia̱-a̱lyiat hu bye yet tazwa á̱nietnzwang á̱nap, á̱kut-a̱tyetuk, ma̱ng tazwa nwuan nkap na nang a̱nyiuk ba ntsot a̱ni mi̱ tashikum.
Nka̱nda̱n ma̱ng cam-vak
-
Ku na yet ta hwa:
- ✅ Ati̱kut nang á̱ ngaat ku á̱ khwuk a̱fai a̱ni gu lan a̱yaabayit 4000 ma̱ng/ku swáng-a̱lyiat 2000.
- ✅ Á̱ bwuak ati̱kut wu tyia̱ di̱n Tyap ma̱ng AI bah.
- ✅ Á̱ ngaat ati̱kut wu ki a̱ khwuk nggu tsi̱tsak a̱tuk mam 1 Zwat Sweang ma̱ng Zwat Tsat 31 a̱lyia̱ 2026
- ✅ Ati̱kut wu gu byia̱ a̱ka̱ta ma̱ng a̱pyia̱-a̱lyiat ka feminizi̱m ma̱ng tashikum. (Á̱ na shim ati̱kut wu ka̱nang gu yet kap ku Tashikum ku Feminizi̱m hwa ma̱nyin.)
- ✅ Ati̱kut wu gu nwai yet A̱kunak.
- ✅ Ati̱kut wu gu yet a̱si̱ nwan wa a̱wot a̱ yet a̱si̱ gu myim a̱ni. Ka̱ doot, gu byia̱ ngya̱fang meang.
Za̱náng
Za̱náng mat mba ba̱ ja̱u konyan mi̱ swanta hu (ba̱ la̱n ma̱ng lyuut a̱yaati̱kut):
🌍 Za̱náng bibyin swanta
- 🥇 Za̱nang 1: – USD 300
- 🥈 Za̱nang 2: USD 200
- 🥉 Za̱nang 3: USD 100
- 🏅 Za̱nang mwang á̱kum á̱niet-yaa̱ywan 10 ba ba̱ lan konyan a̱ni:– USD 50
📍 Za̱náng a̱mali
- Za̱nang mali 1 USD x
- Za̱nang mali 2 USD x
- Za̱nang mali 3 USD x
Á̱ na nwuak a̱mgba̱m za̱náng jini nang gift voucher hwa ma̱nyin.
Ka̱nang a̱yin lyuut a̱ tat a̱yaati̱kut a̱fwuon (5) ba̱ li ca̱caat a̱ni bah, a̱ na san za̱nang bah! Ka̱nang a lyuut a̱yaati̱kut ba̱ tat a̱fwuon a̱wot á̱ si̱ san á̱si̱ ba̱ lat a̱fwuon a̱ni, a na san za̱nang bah.
