Cám Swak ji
Cám Swak ji (A̱biru: עֲשֶׂרֶת הַדִּבְּרוֹת, Aseret ha'Dibrot), á̱ ma ndyen nang Decalogue a̱ni, yet kpa̱m nka̱nda̱n Kpa̱m A̱lyiat A̱gwaza nia na̱ byia̱ a̱meang ma̱ng taada a mbeang kwok ntong, á̱ yet a̱tsatsak nkap mi̱ a̱yaadini Yahuda ma̱ng Ki̱risi̱ta ba. Lyuut Cám Swak hu ku tyai a̱ka̱feang di̱ Kpa̱m A̱lyiat A̱gwaza si̱ Yahuda hu: mi̱ Ghwut 20:2-17 ma̱ng Kwok Cam 5:6-21.
Á̱nietbyia̱lyen ba lak shim nyia̱ á̱ ku lyuut Cám Swak ji a̱wot mbwak a̱nyan wa, a̱wot á̱ghyang á̱nietbyia̱lyen ce si̱ nwuak shim nyia̱ Cám Swak ji ji̱ yet maat cám ma̱ng nda̱p a̱nu A̱hiti ma̱ng A̱mesopotamiya huhwa. Ma̱ng si̱sak kwaa̱mbwat Ghwut hu mi̱ Torah wu, á̱ ku tyai Cám Swak ji a̱zaghyi Musa da̱ A̱fan Si̱nai kikya.[1]
Bwoi swang a̱lyiat
[jhyuk | jhyuk a̱tyin ka]
Mi̱ Kpam A̱lyiat A̱gwaza A̱biru hu, á̱ ku yei a̱lyoot Cám Swak ji עשרת הדיברות (á̱ shyak lyuut hu ntyia̱ aseret ha-dibrot), mi̱ Ghwut 34:28,[2] Kwok Cam 4:13[3] ma̱ng Kwok Cam 10:4.[4] Mi̱ a̱mgba̱m a̱ka̱vwuoneet nkhang na, á̱ maai á̱ bwuak swáng a̱lyiat ji nang "swáng a̱lyiat swak ji", "á̱lyiat mumwang swak na", ku "á̱di̱dam swak na".[5]
Mi̱ Septuagint wu (ku LXX), á̱ ku bwuak "swánga̱lyiat swak" ji nang "Decalogue", zang ja á̱ bwuo neet di̱ Helen wu δεκάλογος, dekalogos, fa ngaan hu a̱wot ku si̱ ta̱fang[6] bwan Helen hu hwa (mi̱ accusative wu) δέκα λόγους, deka logous. Jen jhyang, á̱ ma nyia̱ ta̱m ma̱ng swang a̱lyiat jini di̱n Shong, a mbeang Ncam Swak. Bwan Kpa̱m A̱lyiat A̱gwaza Tyndale ma̱ng Coverdale di̱n Shong ku nyia̱ ta̱m ma̱ng "a̱cyuang zwunzwuo swak" wa. Kpa̱m A̱lyiat A̱gwaza Geneva hu si̱ nyia̱ ta̱m ma̱ng "ncam swak", si̱ ku khwi a̱ni hwa si̱ yet Kpa̱m A̱lyiat A̱gwaza Bishops hu ma̱ng Authorized Version (bwan "King James" hu) nang "ncam swak". A̱ca̱cet bwan Shong ma̱ a̱di̱di̱t ku nyia̱ ta̱m ma̱ng swang a̱lyiat ji "ncam" ja.[2]
Á̱ ku ngyei a̱yaatabi̱let nfang na, mi̱ di̱ nyia̱ fi̱p ma̱ng ncam swak na nang á̱ ku ta̱zut da̱ mba a̱ni, לוחות הברית, Lukhot HaBrit, ku fa "a̱yaatabi̱let la̱p a̱nu ba".
A̱ya̱fang
[jhyuk | jhyuk a̱tyin ka]- ↑ "Ten Commandments | Description, History, Text, & Facts". Encyclopedia Britannica. (di̱n Shong)
- ↑ 2.0 2.1 "Exodus 34:28 – multiple versions and languages". Studybible.info.
- ↑ "Deuteronomy 4:13 – multiple versions and languages". Studybible.info
- ↑ "Deuteronomy 10:4 – multiple versions and languages". Studybible.info.
- ↑ Rooker, Mark (2010). "The Ten Commandments: Ethics for the Twenty-First Century". B&H Publishing Group: Nashville, Tennessee. P. 3. ISBN 978-0-8054-4716-3. The Ten Commandments are literally the 'Ten Words' (ăśeret hadděbārîm) in Hebrew. In Mishnaic Hebrew, they are called עשרת הדברות (transliterated aseret ha-dibrot). The use of the term dābār, 'word,' in this phrase distinguishes these laws from the rest of the commandments (mişwâ), statutes (hōq), and regulations (mišpāţ) in the Old Testament. (di̱n Shong)
- ↑ δεκάλογος