A̱za̱za̱rak Juma

Maba̱ta̱do

Fantswam

Gworog

Sholyia̱

Takad

Tyeca̱rak

Jhyen

Á̱ lyuut ati̱kut wuni di̱n Tyap Maba̱ta̱do ja (Maba̱ta̱do)

A̱za̱za̱rak Juma

A̱za̱za̱rak mam Krista, mam fwung a̱byin

Tafa	Juma
Yet kap	Paschal Triduum
Yet a̱ci̱t	Maundy Thursday
Si̱ a̱ ntung a̱ni yet	A̱za̱za̱rak A̱tuk A̱sa̱ba̱t
Jhyung	crucifixion of Jesus
A̱sa̱khwot	violet, a̱dyundyung
Mam a̱lyia̱	Easter − 2 days
Mam sati	Juma
Hashtag	Karfreitag, GoodFriday

 

 Neet mi̱ Wukideita

A̱za̱za̱rak Juma yet a̱tuk mam fwung Á̱nietkhwiki̱risi̱ti kya nang á̱ ku kpang Yesu da̱ a̱team a̱khwu ka a̱ni a̱wot a̱ si̱ khwu da̱ A̱vwuo A̱ghyighyak A̱pyia̱ ka nang á̱ ngyei Goli̱gota da̱ a̱lyem A̱biru ka a̱ni. Á̱ ka nkyiak nggu nang A̱za̱za̱rak Sati wa a̱ni nang kap Paschal Triduum. Á̱ ka ngyei nggu A̱tan Juma, A̱gba̱ndang Juma, A̱gba̱ndang ma̱ng A̱za̱za̱rak Juma (ku A̱za̱za̱rak ma̱ng A̱gba̱ndang Juma meang), ku Juma Cat A̱tyoli ji.

Á̱kum-á̱niet susot Á̱nietkhwi ka, bi̱ri̱ng ma̱ng A̱katolika, A̱todok A̱tyin, Luteran, Anggi̱likan, Metodi̱t, A̱todok Oriyentat, Badundung Pi̱rotesi̱tan, ma̱ng a̱yaataada Ri̱fom á̱ghyang (nang a̱yaacot Ri̱fom Konti̱nentat, Pi̱resi̱biteriyan, mbeang Kongi̱rigeshyonali̱t, á̱ghyang ni̱ sak A̱za̱za̱rak Juma wu ma̱ng swan a̱fa-a̱khwot ma̱ng cong dyep A̱gwaza. Mi̱ a̱yaacot Katolika, Luteran, Anggi̱likan, mbeang Metodi̱t ma̱ a̱di̱di̱t, á̱ ka nnyia̱ Naai A̱gba̱ndang A̱dyundyung-a̱fa A̱yaawa A̱tat hu kyiak neet ma̱ a̱ka̱wa̱tyia̱ a̱ta̱mam ba̱ng si̱ nat tswam 3 jsh— a̱yaawa ba nang Kpa̱m A̱lyiat A̱gwaza hu ku shei nyia̱ lyin ku kup a̱byin ka ba̱ng si̱ nat mi̱ jen kwi Yesu ji da̱ a̱team a̱khwu ka. Mi̱ a̱yaataada Katolika, Luteran, ma̱ng a̱si̱ Anggi̱likan ba, á̱ ni̱ nyia̱ naai Tityan-ncyui A̱team A̱khwu hu a̱jenshyung A̱za̱za̱rak Juma ka, nang mi̱ Juma Jen Fwui A̱nu njhyang. Á̱kum-á̱niet Cot Moraviya ka byia̱ taada A̱za̱za̱rak Juma nang ka̱ ni̱ cong lyang bibi da̱ a̱ka̱vwuoniat nkwom a̱byin Moraviya na.

Mam A̱za̱za̱rak Juma hu ngya a̱son kyiak neet ma̱ a̱lyia̱ a̱nyiung ba̱ng si̱ tat a̱lyia̱ ntung ka ma̱ ká̱la̱nda Gi̱regi̱ri ji ma̱ng si̱ Juliyot ji. Khwiki̱risi̱ti A̱tyin hu ma̱ng si̱ Jenshyung hu ngya fwuang tazwa a̱tsak mam Ita wu; mat a̱nia, dundung ma̱ng a̱si̱ A̱za̱za̱rak Juma wu mameang. A̱za̱za̱rak Juma wu yet a̱gba̱ndang mam fwung wa da̱ a̱ka̱vwuo ma̱ a̱di̱di̱t mi̱ swanta hu. Bibyin ghyáng nang a̱lyiak á̱niet mba wu yet Á̱nietkhwi bya, nang Jami̱ni, byia̱ cám ji̱ nvwuong za̱kwa njhyang ma̱ á̱niet—nang song mami á̱niet, cung a̱zama ntsaaí—mi̱ di̱ jhyung yet a̱dyundyung-a̱fa A̱za̱za̱rak Juma hu.