Bwuok A̱fan

Bwuok A̱fan

festival

Vam-a̱byin	Afrika
A̱byin	Naijeriya
Shyia̱ di̱ fam tyok a̱byin	Si̱tet Ka̱duna, Gwoot
Coordinate location	9°36′27″N 8°23′36″E

Bwuok A̱fan ku Song Bwuok A̱fan yet tangka̱i song ja nang á̱ nyia̱ kuzang a̱tuk 1 Zwat Jhyiung mi̱ Gwoot, a̱tak, Si̱tet Ka̱duna, Fam A̱ka̱wa̱tyia̱ Naijeriya. Á̱ ku lyiat a̱lyiat nyia̱ ku na tat ndyia̱ 400 neet nang á̱ ku tsa song jini a̱ni. Á̱ ni̱ song bwuok jini neet da̱ a̱fan ka kuzang a̱tuk 1 Zwat Jhyiung kya magwam A̱gwoot ka, Sot A̱gwomnati Mali Watyap.

A̱fan A̱gwoot ka.

Á̱ ngyei song jini "Bwuok A̠fan" da̱nian mi̱ taada á̱niet a̱keang ka, á̱niet a̱kat ba ni̱ nyeak a̱fan ka ka̱nang ba̱ cat cong a̱ nat a̱kat a̱ni di̱n jen a̱vwuoshyim. A̱ga̱nga̱ng A̱fan A̱gwoot wu si̱ yet sot a̱ka̱sham a̱ka̱fan ji̱ byia̱ shi a̱za ku bai mita a̱ni tazwa shi kyai a̱sa̱khwot. A̱ca̱cet a̱ka̱kwon laai a̱ shi a̱zafan ka a̱wot kuntyin hu si̱ yet a̱kpa̱u wa. Lili-a̱vwuo hu ndi nang si̱ Pi̱lato Nja̱t ma̱ng the Pi̱lato Ma̱mbila, ma̱ng a̱va za di̱n jen a̱kwa̱i. Gbangbang, A̱gwoot ba ku swan nkuu nia ma̱ng a̱zafan ka ba̱ si̱ labeang ba̱t a̱wot ba̱ si̱si̱ nta̱bat corop ba̱ swan a̱tak a̱fan ka ma̱shonshyon ma̱shonshyon ba̱ng si̱ tat jen ji á̱nietcen A̱bi̱ri̱ti̱n ba si̱ vwuong mba kpa̱mkpaan ma̱ng a̱mgba̱m ba̱ si̱ cyok a̱byin di̱ kap ntsa sa̱ncuri 20 hu shimba a̱baka̱keang á̱ghyang ni̱ shyia̱ a̱ja tat a̱fwun a̱zafan ka. A̱ka̱fan na yet a̱ka̱vwuo ta̱kup á̱niet nia di̱n jen ji á̱niet ntsaai ba ku nnwuai ma̱ á̱niet ba a̱wot a̱ka̱sorong shwaí na̱ ba̱ ghwut di̱ na̱ tang mba ba tyia̱ tirare ma̱ á̱niet ntsaai ba.