Ghyuai kurum hya̱u nkyangcung mi̱ Naijeriya
| A̱byin | Naijeriya  |
|---|---|
| A̱kwak a̱son a̱gwomna̱ti | Bola Tinubu |
| A̱tsak jen | Zwat Tswuon 2023 |
Ghyuai kurum hya̱u nkyangcung mi̱ Naijeriya yet naat mbwuot hwa mi̱ Naijeriya. Neet di̱ shyia̱ hya̱u ma̱ a̱byin Naijeriya ka ma̱ a̱lyia̱ 1956 mami Si̱tet Ba̱yelsa mi̱ fam Da̱li̱ta Nija, a̱niet ba ku kwai hya̱u hu ma̱nang á̱ ku ndyiai nhu mi̱n káswuo bibyin Swanta ji a̱ni. Hya̱u nkyangcung ku byia̱ kurum za̱m. Ku ku li nang tong hwa a̱ni da̱ a̱vwuo a̱niet ma̱di̱dit. A̱niet byia̱ a̱ka̱nkurum ma̱ng nkyang zwá bya ku kwai hya̱u hu. Ma̱ng a̱niet a̱bya bya ku byia̱ nkyangcung na ma̱nyin mba.
Á̱ ncong a̱ si̱ tat 1970 a̱ni, a̱ca̱cet a̱niet ba̱ shyia̱ ma̱ A̱gwomna̱ti ba̱ a̱ni si̱ dam beang a̱niet Naijeriya ba ba̱ ka shyia̱ kwai hya̱u hu di̱ mi̱n hyaai kurum ma̱di̱di̱t bah. Cat beang a̱niet hu hwa si̱ tyia̱ A̱gwomna̱ti ba si̱ nwuo teang a̱ka̱nkurum a̱ghyang na̱ myim a̱niet Naijeriya ba ba̱ teang di̱ kwai hya̱u hu a̱ni. Si̱ huni hwa si̱ tyia̱ kyiak neet di̱n jen a̱ja, a̱niet Naijeriya ba si̱ nshyiat hya̱u hu á̱ kwai ku di̱ ba̱ byia̱ kurum ku tat a̱ga̱faat a̱ but a̱ni bah.
Kurum hya̱u á̱ ku teang á̱ nkwai a̱ni ku yet ma̱ng kyang nyiung hwa bah. A̱ka̱sa lyiai hya̱u á̱ghyang ku ghyuai kurum lyiai hu za̱m. A̱ka̱sa á̱ghyang si̱ ntyei kurum hu ba̱t. Ku li a̱ ngyei da̱ á̱ ku mbyia̱ A̱kwoka̱son A̱byin Naijeriya a̱ ku nwai mbeang hya̱u a̱ni bah.
A̱cyiet ka si̱ cong a̱ tat 2023. Mi̱n Zwat Tswuon ji̱ swak a̱ni, a̱niet Naijeriya ba si̱ nat A̱gba̱ndang Khai. Á̱ ku ntyak Khai hu a̱ni, Sa̱neto Bola Ahmed Tinubu, a̱tyu á̱ ngyei ma̱ng Bola Tinubu a̱ni wa a̱ si̱ nyia̱ a̱ya nhu. A̱niet ba̱ ku khai nggu a̱ni si̱ cat a̱khwu mat a̱gwai na.
A̱ ku bwuo mmam ma̱di̱di̱t bah, Sa̱neto Tinubu si̱ hyia̱ ma̱ng a̱niet ba nang Tyok nggu hu na nfwung teang kurum hya̱u hu. Ghyuai kurum hya̱u hu zi̱ za lyen a̱ni si̱ bai tyak. Kyiak neet a̱tuk ka A̱kwaka̱pyia Tinubu nhyia̱ a̱lyiat a̱nia a̱ni, kurum hya̱u nkyangcung si̱ ka nnyeak ma̱ a̱nggang. Hya̱u á̱ ku kwai lita a̱nyiung da̱ ₦184 a̱ni si̱ ki mbai ₦600 ma̱ng kyang tazwa ma̱ a̱ka̱keang á̱ghyang. Da̱ a̱kwonu a̱kya, da̱ a̱yin a̱vwuo nang Legwot ma̱ng Ibadan a̱ni, á̱ ku lyiai ₦500.
Di̱ yong huni mi̱ Zwat A̱taa 2023, A̱gwomna̱ti ba lyiai hya̱u hu ₦488 di̱ lita a̱nyiung. Shai kurum kwai hya̱u huni bai ma̱ng a̱niet Naijeriya ba a̱bung ba̱t. A̱mgba̱m nkyang á̱ lyiai mi̱n Káswuo ji ma̱nini ka a̱ni mban a̱ka̱nkurum ma̱t ghyuai kurum hya̱u A̱gwomna̱ti Naijeriya ba ti̱n a̱ni.