Valahya

Valahya

historical region

A̱lyoot da̱nian	A̱vi̱lak, Wallachia
Demonym	valaker, Wallachian
A̱lyem a̱gwomna̱ti	Romaniya
Vam-a̱byin	Yurop
A̱byin	Romaniya
A̱keangtung	Câmpulung
Coordinate location	44°25′48″N 26°6′0″E
Sa mat tá̱si̱la	Category:Maps of Wallachia

Valahya ku Wolahya (Romaniya: Țara Românească, á̱ ngyei [ˈt͡sara romɨˈne̯askə]; a̱khwukhwop: Țeara Rumânească, Zwunzwuo-a̱lyem Ki̱rilyut Romaniya: Цѣра Рꙋмѫнѣскъ) yet fam-a̱byin Romaniya hwa mi̱ nkhang ma̱ng lili-a̱byin. Ku shyia̱ di̱ nfam a̱za Da̱nube A̱tatak ma̱ng a̱tak A̱tak Kapat ni̱nia. Neet a̱fwun bah, á̱ ka̱u Valahya di̱ nkap taada nfeang nia, Munteniya (A̱gba̱ndang Valahya) ma̱ng Oli̱teniya (A̱da̱dei Valahya). Á̱ maai mbeang Dobi̱ruja jen jhyang nang kap tat hu mat si̱sak nang ku shyia̱ kpa̱mkpaan ma̱ng a̱banjen (a̱bapi̱rovin) á̱ ku nyia̱ tyok tazwa nka a̱ni. Á̱ ni̱ ngyei a̱mgba̱m Valahya Munteniya di̱n jen jhyang mat nang huhwa yet kap ku swak yet gba̱ndang di̱ nkap taada nfeang na a̱ni.

Basarab I wa ku kpaat Valahya nang a̱byintyok-a̱fai-a̱gwam a̱ni di̱n tsa sa̱ncuri 14 hu lilyim tyeizat nang á̱ nyia̱ Charles I a̱si̱ Honggi̱ri a̱ni, shimba jen tsa nang á̱ ku lyiat tazwa a̱byin Valahya di̱ fam jenshyung A̱ghyui Oli̱t hu jija ku yet jen ji Béla IV a̱si̱ Honggi̱ri ku nwuak vwuoivwode hu nang á̱ ngyei Seneslau a̱ni cet tyok ma̱ a̱lyia̱ 1246. Ma̱ a̱lyia̱ 1417, á̱ si̱ tyia̱ a̱byin Valahya ta ka̱ shim A̱byintyokshan A̱toman ka ka̱ nyia̱ tyok tazwa nka; a̱wot si̱ huni si̱ labeang ba̱ng si̱ bai sa̱ncuri 19 wu.

Ma̱ a̱lyia̱ 1859, Valahya si̱ muna̱pyia̱ ma̱ng Ma̱li̱daviya a̱wot bibyin feang hu si̱ bwuak tyia̱ Muná̱pyia̱ Bibyin-á̱fai-á̱gwam, ku sii du khai a̱lyoot ka Romaniya ma̱ a̱lyia̱ 1866 a̱wot a̱gwomna̱ti ba si̱ bwuak tyia̱ A̱byintyok Romaniya ma̱ a̱lyia̱ 1881. Lilyim ma̱ng jen a̱ja, ma̱nang á̱ mbi̱ri̱m A̱byintyokshan A̱ti̱riya-Honggi̱ri ka ma̱ng kyang hu á̱ ku shim ndyo a̱ni mi̱ swat á̱ghyi Romaniya hu ma̱ a̱lyia̱ 1918, á̱ si̱ ka̱u Bukovina, Ti̱ransi̱li̱vaniya ma̱ng nkap Ba̱nat, Ki̱rishana, ma̱ng Ma̱ramuret á̱ si̱ nwuak A̱byintyok Romaniya, mat a̱nia, kyang hu ku yet a̱byin Romaniya a̱fwun ka si̱ bai yet.