Lawrencia Mala̱m

Lawrencia Mala̱m

a̱tyubishyi

Sot mbyin	a̱nap
A̱byin mbyin	Naijeriya
A̱lyoot nang á̱ ku tyia̱ nggu	Lawrencia
Lilyem a̱ lyen lyiat, lyuut ku tyia̱ bwak ma̱ng a̱nhu a̱ni	Shong, Tyap
Ta̱m	a̱gwak lyen-a̱beam

Lawrencia La̱ra̱ba-Mala̱m yet Minisi̱ta Bibeam Naijeriya gbangbang wa tsi̱tsak 2014–2015. A̱ ku yet a̱tyonyiung mami mminisi̱ta 12 na nang A̱kwak A̱son A̱byin Goodluck Jonathan ku shyi a̱ni mi̱ Zwat Tsat a̱lyia̱ 2014. A̱ci̱t nggu wu wa si̱ yet Amina Mohammed. A̱zaghyi njen a̱ja nang á̱ khai nggu gu yet minisi̱ta a̱ni, nggu wa ku yet A̱kwak A̱son A̱byin, Sot-nta̱m A̱nyiuk Katolika (Shong: Catholic Women Organization, CWO).

A̱kariya minisi̱ta

Di̱n jen ta̱m nggu ji ja á̱ ku ta̱m ma̱ng ta̱m ghyang nang á̱ ngyei Great Green Wall (GGW) a̱ni á̱ si̱ shim nhu a̱tutukpacam a̱byin Naijeriya wu, mat á̱ kpaat vak hu nang nta̱m na̱ na mbeang zwang yai tswa a̱ji̱jak ji ma̱ng á̱lyiat na̱ byia̱ a̱ka̱ta ma̱ng a̱koloji na nkai a̱ni. Mat a̱nia, ofit A̱kwak A̱son A̱byin wu si̱ nnwuak kurum ku bai kpa̱mkpaan ma̱ng bilyon ₦16 mi̱ Zwat A̱kubunyiung a̱lyia̱ 2014, á̱ ka ntsa ta̱m hu.

Ma̱nang gu ku lyiat nang Dipatmen Byi̱k Bibyin Swanta a̱byin Muna̱pyia̱ A̱byintyok hu sii du tyai a̱ma̱ntei Gas Flare Tracker, ka̱ maai hyei shi wun gat nang á̱ vwuot mi̱ wun a̱ni di̱ fam Da̱li̱ta Nija hu, mi̱ Zwat Swak ma̱ng Jhyiung a̱lyia̱ 2014, huhwa A̱yang-a̱li Mala̱m si̱ nyia̱ a̱ni,

Kuzang jen ja nang zi̱ nat a̱ka̱tung mi̱ bibyin nta, nyi lyen, zi̱ ni̱ fwuong bibyin nghyang nang ku hyei shi wun gat a̱mang hwa nang ku ku nvwuot kyai tswazwa hu, a̱wot nzi̱t, zi̱ ni̱ tyan wa. Mi̱ kyiak neet da̱ a̱fwun ka, zi̱ bu na tyan bah, zi̱ na nwuak a̱ca̱caat shi wu wa, da̱nian a̱tala-nzop wuni.

Ghwum nkat ma̱ng kai a̱ ghwon

A̱tuk mam 3 Zwat Swak a̱lyia̱ 2016, Lawrencia ma̱ng a̱tyoli nggu wu a̱ yet ndyia̱ 73 a̱ni, nang á̱ ngyei nggu Payot Mala̱m, si̱ nwuo mbwak á̱niet ghwum á̱niet-nkat ma̱ng a̱mba ma̱ a̱keang Jere, da̱ a̱kpai a̱ta̱lyen Ka̱duna-A̱buja wu. Da̱ mba, ba̱ si̱ fwan a̱ja tat áwa 48 a̱wot á̱ si̱ ba̱ ghwon mba ba̱ nkat.