Bivan Magoni
| Sot mbyin | a̱sam  |
|---|---|
| A̱byin mbyin | Naijeriya |
| A̱lyem mbyin | Tyap |
| Lilyem a̱ lyen lyiat, lyuut ku tyia̱ bwak ma̱ng a̱nhu a̱ni | Shong |
| Ta̱m | a̱tyukwok-nkhang, a̱tyufuut cat-a̱shai |
Bivan "Beevan SickForces" Magoni yet a̱tyukwok-nkhang a̱zagaat ma̱ng a̱tyufuut cat-a̱ka̱wat á̱niet Naijeriya a̱nyan wa nta̱m nzop a̱cucuk nkhang nggu na[1][2][3] ni̱ byia̱ a̱ka̱ta ma̱ng á̱ka̱tuk nyia̱ a̱ naat mbwuot a̱ni ma̱ A̱tak Ka̱duna, fam ghyang ku shyia̱ Si̱tet Ka̱duna a̱ni mi̱ Naijeriya, nang A̱fa̱taa ba ku ti̱n-a̱ghyi tazwa ba̱ hyaai di̱ mi̱n fwuong kunak kyiak neet ma̱ a̱lyia̱ 2011 ba̱ng si̱ bai a̱lyia̱ 2023. Mi̱ Zwat Swak ma̱ng Sweang 2022, Bivan si̱ jhyi ghwughwu-a̱guguut kwok nkhang nang á̱ ngyei, “Southern Kaduna: Blood, Tears & Anger” a̱ni, ma̱nang gu mak koot a̱sok ku naat mbwuot a̱ni ma̱ A̱tak Ka̱duna di̱n jen a̱ja ma̱ng tsaai á̱niet nang A̱fa̱taa ba ba̱ yet a̱nietkpaa̱kpeang nyia̱ a̱ni ma̱ng impak nang ji̱ byia̱ a̱ni tazwa á̱niet ba.[4][5]
A̱guguut cat-a̱wat á̱niet[jhyuk | jhyuk a̱tyin ka]
Cat-a̱wat á̱niet nang Bivan nwuo a̱ni si̱ hyaat lyilyim hyaai nggwon a̱na̱nyiuk nggu ka ma̱ a̱ka̱tuk nyia̱ nang á̱ bai nyia̱ a̱bakeang nggu ka Gan, mi̱ Kanai, ma̱ A̱tyap, ma̱ a̱tuk mam 6 Zwat A̱ni̱nai 2020. Nang sati nyiung swak a̱ni, huhwa gu si̱ ta̱ngam a̱ nat di̱ tak byian fwuo nggu hu ma̱ a̱keangtung Naijeriya ka, A̱buja, ma̱ a̱tuk mam 15 Zwat A̱ni̱nai ma̱ Unity Fountain ma̱ng US Embassy, dundung ma̱ng á̱kpa̱ndang nta̱m nggu ba ba̱ ku yet nfi̱ng A̱tak Ka̱duna nia, á̱kpa̱ndang cat gbi̱ngban, á̱nietnkwok-nkhang ma̱ng á̱niet a̱guguut cat-a̱wat neet nfam Naijeriya vwuon.[6]
Mi̱ Zwat Tsat 2021, A̱khwot Á̱kwop A̱byin Naijeriya ba si̱ kin nnwuai ma̱ á̱niet a̱khwukhwop a̱tyia̱ nggu ba ba̱ si̱ ta̱bat a̱khwukhwop wu ba̱ si̱ ta̱gbi̱k ngguu a̱mali nggu ka a̱ma̱lyim cong a̱guguut cat a̱ka̱wat nang a̱nyiuk ba ku nyia̱ a̱ni mi̱ swat nyenyang ma̱ a̱bakeang ka mat a̱khwot á̱kwop ba, a̱wot ba̱ si̱ ba̱ ma a̱ hyat a̱byii̱k a̱ghyang nang a̱tyok nggu wu ku saan a̱ni nang á̱ ku ngyei Mama Naomi John a̱ni. Bivan wu si̱ nkwok ma̱ng sot Foundation for Investigative Journalism (FIJ) ji ndyo ma̱ a̱tson a̱tuk a̱kya nyia̱, “Ba̱ ku nwuo a̱mali a̱tyia̱ nung ka lyuo ba̱ si̱ bwuak á̱ tyia̱ a̱vwuo ka ka̱ li ya̱yaat. Ba̱ si̱ ta̱bat ba̱ si̱ nyia̱ ma̱ng a̱nietkhwop-a̱niet wu a̱ khwop a̱ swak a̱mali ka ma̱ng shi ndyia̱ nku na ntat 80 a̱ni.”[7]
Mi̱ Zwat Tsat 2022, a̱ si̱ kwok ma̱ng a̱ghyi sot A̱nwuat A̱merika (VOA), Timothy Obiezu, a̱ma̱lyim nang á̱ka̱tuk á̱niet á̱ghyang khwom ba̱ si̱ byian vak cung a̱taintuut hu ba̱ si̱ ya̱baat ba̱ si̱ bwuk ma̱ng si̱ ku swak á̱nietcyet 900 ba̱ si̱ ba̱ hyat a̱tyunta̱m la̱rwe a̱nyiung meang mi̱ a̱taintuut ku cyet naat mi̱ Ka̱duna neet mi̱ A̱buja a̱ni, a̱ si̱ nyia̱, "Á̱ hyaai á̱niet kuzatuk. Mi̱ a̱ka̱mang wa nang a li ba̱ ta̱bat á̱ka̱tuk á̱niet a̱bya? Zi̱ van ma̱ng koot a̱sok na, zi̱ van ma̱ng kuzang kyang, kyang byian fwuo hwa hu la a̱ghyang-nzi̱t!"[8]
Ya̱fang[jhyuk | jhyuk a̱tyin ka]
- ↑ Olayinka, Olamuyiwa (Zwat Swak ma̱ng Sweang 26, 2022). "Genocide Committed In Southern Kaduna!!! (graphic video)". Olamuyiwa.com.ng. Retrieved Zwat Nyaai 11, 2023.
- ↑ Magoni, Beevan; Kefas, Steven (Zwat A̱taa 30, 2022). "XCLUSIVE: How Attack Helicopter Secured Terrorists And Sprayed Southern Kaduna Villagers With Bullets". Middle Belt Times. Retrieved Zwat Nyaai 11, 2023.
- ↑ Juliet (Zwat A̱natat 11, 2020). "Deaconess Tortures Ward By Burning Her Genitals With Hot Iron, Fire". 247NNU. Retrieved Zwat Nyaai 11, 2023.
- ↑ Ọmọ Yoòbá, Adéṣínà (Zwat Sweang 21, 2023). "As Nigeria goes into a general election, a street reporter shot a documentary on the rising violence and insecurity in Southern Kaduna". Global Voices. Retrieved Zwat Nyaai 11, 2023.
- ↑ Hundeyin, David (Zwat Swak ma̱ng Sweang 24, 2022). "Southern Kaduna: Blood, Tears, Anger [DOCUMENTARY]". Retrieved Zwat Nyaai 11, 2023.
- ↑ Obiezu, Timothy (Zwat A̱ni̱nai 25, 2020). "Southern Kaduna Villagers Stand Up to Security Threats, Killings". VOA. Retrieved Zwat Nyaai 11, 2023.
- ↑ Oladipupo, Adeola (Zwat Tsat 25, 2021). "Soldiers 'Kill' Widow During All-Women Protest Against Army in Southern Kaduna". Foundation for Investigative Journalism. Retrieved Zwat Nyaai 11, 2023.
- ↑ Obiezu, Timothy (Zwat Tsat 28, 2022). "Train Attack in Nigeria Reportedly Kills 7, Leaves Many Others Missing". A̱buja: VOA. Retrieved Zwat Nyaai 11, 2023.
A̱ka̱fwuop nta[jhyuk | jhyuk a̱tyin ka]
- Street Reporter di̱ Soundcloud.
- Southern Kaduna: Blood, Tears and Anger mbwak SaharaTV di̱ YouTube.